Sekukaningi ngizwa, futhi ngibona loludaba ludingidwa ezindaweni ezahluka hlukene, ngisho nasezinkundleni zokuxhumana imbala. Uzokhumbula ngonyaka ka 2016 kwabakhona isigameko lapho khona umculi wakuleli we Hip Hop u-AKA evutha engabaselwe ku Twitter ngodaba lokuhlawula ingane yakhe uKairo Forbes.
Loludaba lwenhlawulo luthanda ukudida abaningi ngenxa yokuthi lusingathwa ngezindlela ezingafani ezindaweni nasemindenini eyahlukene, kodwa isisekelo salo sisodwa.
– Yini le esuke ihlawulwa?
– Kungani kumele ihlawulwe?
– Kuhlawulwa ngani?
Ezikhathini zakudala wawungandile lomkhuba wokukhulelwa kwezintombi zingakafinyeleli esigabeni sobufazi, into eyayithathwa njengehlazo. Intombi yayilinda ukuba iziqede zonke izigaba zobuntombi bayo, kanti nensizwa yayilinda ize iphume ebufaneni ngaphambi kokuba ikhulelise. Kwakuthi uma kwenzekile intombi yakhulelwa kuthathwe njengehlazo elibi kabi lokho, bese kuthweswa icala lowo oyikhulelisile ukuba ayihlawule. Yebo! Kuhlawulwa intombi ekhulelwe, hhayi ingane.
Kuyaxaka ke esikhathini samanje umuzwe owesilisa ethi “Ingane isizobiza isibongo sami ngoba sengiyihlawulile”. Cha akunjalo! Ingane ezalelwe ekhaya iba umlanjwane – ithatha isibongo sasekhaya konina. Yingakho kudala lowo okhulelise intombi ayencishwa ngisho ithuba lokuyibona ingane (ngisho noma esemhlawulile unina) ngoba phela kwakuyicala elalingaxoleleki kalula. Yingakho namanje umuntu ehlawuliswa ngezinkomo uma enze leli cala.
Yize kuhluka ngezindawo nezindawo, kodwa kuvamile ukuthi kuhlawulwe ngezinkomo ezimbili nembuzi uma kukhuleliswe intombi. Inkomo yengquthu kanina wentombi; inkomo yesidikli yokugeza izintombi ebezikade zihamba nayo ebuntombini lentombi; kanye nembuzi yokugeza umuzi womnumzane osuke uwuncgolisile. Ingane ayingeni ndawo ekuhlawulweni kukanina.
AKA paid damages, according to my knowledge that is supposed to be 1/2 cows. those cows are for 'cleansing' the family not to 'buy' Kairo ✋.
— njabulo mbatha? (@fourrforty) May 27, 2016
Ezikhathini zamanje izingane sezithandana zincane, zizalisane, bese ziyahlukana; nabantu asebekhulile bayakwenza lokhu. Kwenziwa njani ke ngengane ezelwe maqede kwahlukana abazali bayo? Ingabe iyayekwa ikhulele ekhaya konina? Kuze kufike kusiphi isigaba?
Abe-Statistics SA baveze ukuthi cishe u 56% wezingane zikhula ngaphandle koyise eNingizimu Afrika. Ingxenye ethize yalezi zingane isuke inabo obaba bephila, kodwa basuke bengekho ezimpilweni zazo ngenxa yalomthetho wokuhlawula. Uthi umuntu uma esekhulile (usubuye kahle umqondo) umuzwe esethi “Sengiyayifuna ingane yami, ngizomane ngiyilobole”.
Umbuzo wami uthi uzoyilobola ngezingaki? Uzoyilobola maqede ikugane? Impela angiyizwa kahle le yokuthi kulotsholwa izingane zilotsholwa oyise. Kanti kuyini ukulobola, bakwethu? Mina ngazi ukuthi kulotsholwa intombi ngenhloso yokuthi igane, kanti futhi inkomo yokulobola ngayinye inencazelo yayo. Uma uyolobola ingane yakho ufike umemeze uthini kwamnumzane womuzi?
It's not hectic sometimes it's our tradition if the damages weren't paid then no need to put surname https://t.co/L6rkjhuOna
— Sbonda wakwi Suburbs? (@Abosh000) February 12, 2017
Ngokwesiko eliqondile, ingane ekhulele ekhaya konina (umlanjwane) isithatha mhla iganwa noma igana isobongo sikayise. Yebo izikhathi sezashitsha. Mhlawumbe uyise wengane engasiza ekukhuleni kwayo ingane ngisho ngabe ikhulela khona ekhaya konina, bese uma sekufike isigaba sokushada/sokushadelwa kwayo ayifaka esibongweni sakhe ngokosiko lwakhona.
— Maqhawe Ngubane
Loading ...
Comments(14)
Mduduzi says
January 16, 2023 at 11:16 AMUmangabe ngikhulele koMama futhi mgisebenzisa isibongo sikaMama, kwenziwanjan masekufanele ngingene esibongweni Sami, ingabe nginelungelo lokuzihlawula Uma uBaba ongizalayo engasekho emhlabeni?
Linda Mpungose says
June 12, 2023 at 1:04 PMCha, awukwazi ukuzi hlawula. Phela akuwena owoniwayo, kepha umama wakho. Kodwa abakubo kababa wakho kumele kube yibona abenza isiko lokukukhipha esibongweni sikamama wakho, bakufake kwesakho, ngokulandela isiko lakhona.
Thembelihle Eugene Ngcobo says
May 26, 2022 at 3:34 PMKuyezwakala. Mina ebengifisa ukukwazi ukuthi nanci-ke ingane yentombazane isihlawuliwe yakhokhelwa ukuthi ibize isibongo sikayise.kwenzekani ngesikhathi isimbeswa? Abakomalume kukhona abakutholayo okunjengezimpahla zomembeso. Uma bekhona, kuba wobani?
Lungile says
April 29, 2021 at 9:49 AMUma ingane izelwe kmuntu vele ongaseyonintomb aphinde uyise wengane ayphike mesethola ukuth neyakhe usefuna ukuyhlawlelake kumiswa kanjnke
Bhekinkosi says
February 11, 2021 at 10:58 PMIntombazane esikhuleliswe amasoka ahlukene, elesibili nelesithathu kumele bahlawule?
Mongi says
November 14, 2022 at 10:46 AMYebo kunjalo wonke lawa masoka ngokulandelana noma ngokwehlukana kwawo kumele ahlawule. Uma kuvela umuntu othi uyayithatha intombazane uyenza umkayo, zonke lezi zinkomo ezinhlanu (5) okuhlawulwe ngazo azibalwa, ziyephulwa, isibonelo: uma intombazane inezingane ezinhlanu ngokukhuleliswa amasoka amahlanu ehlukene leli elesithupha uma lilobola seliyokhokha izinkomo eziyisithupha (6) kuphela kweziyishumi nomuvo (11).
Zanele says
January 6, 2023 at 2:04 PMIntombazane esikhulelwa isibili obaba abahlukene iyahlawulwa yini
Sintu Mchunu says
January 22, 2021 at 2:40 PMUqinisile umbhali ongenhla kunjalo nje yekani ukwenza amacala bafowethu asakhe isizwe imibuzo engaphenduleki izophela uma kwenziwa okufanele.
Mbali says
January 5, 2021 at 11:33 AMNgiyabingelela bengisacela ukubuza ukuth uma nize nathola ingane ezimbili endala kwahlawulwa kuyo ngabe nale ncane kuphinde kuhlawulwe. Uma ihlawulwa kuke kube inhlwawulo engakanani ke kuyo. Ngiyabonga
Aaron says
January 4, 2021 at 9:53 AMIntombazane esele ibelekile isisu siyakwazi ukuziswa
JM says
October 25, 2020 at 3:20 AMNgibuze ukuthi uma uzalise ntombazane izingane wazihlawula zonke uma usuyilobola ziyavuka yini lezinkomo zenhlawulo zingene kwilobolo noma cha akuvuki ngisho eyodwa
Nathi Ntshangase says
July 24, 2018 at 11:26 PMUmbhali akaphumi nagama ekutheni kwenziwanjani ke uma ingane isizelwe behlukana abazali. Leli lokulinda umshado alizwakali sdalo ngoba yinto engeqinisekiswe ukuthi iyokwenzeka, ngaphezu kwalokho, ingane yentombazane iyobe isayaphi kwayise ekubeni isiyogana kwesinye isibongo vele? Kwanayo eyomfana, iyokhula yazi amasiko nemikhuba yasekhaya konina okwakubo ingakwazi bese mhla iganwa kuthiwe ayakhe umuzi wakubo, kanjani?
Kwelokulobola ingane, mhlampe kusweleke igama lokubiza. Mina ngiyasibona isidingo sokuthi umuntu akhishwe ngokufanele edlozini lasekhaya konina, angeniswe kwelakubo. Uma abasekhaya konina kukhona abakubizayo ngalokho, amgiliboni iphutha lapho. Yikho ke ukuthi igama lokubiza lokhu asinalo kahle, ngaphandle kokuthi ukulobola.
Zipho Ngcobo says
October 31, 2020 at 11:24 AMMgazi uyibeka kahle lento, ngiyakuzwa mina. Ukube bengizothola inombolo yakho yocingo.
Thembinkosi Zuma says
August 29, 2021 at 7:12 AMAsiyicacise lento uma ntombazane noma umfana eseshada akushiwo ukuthi akaye esibongweni sakhe Kodwa kusuke kuvezwa umlando esigcawini kuthemelezwa emathongeni yalayikhaya ukuthi lo oshadayo noms lo esimkhiphayo uzalwa usibanibani esibongweni esithile uma ke kungumfana efuna ukuqonisa umlando wakhe ube sekhuluma nomalume bakhe nomdeni kayise kulandelwe imigudu ethize ukuze ashitshele esibongweni sikayise omunye qhubeka nesasekhabonina .ngoba kwesinye isikhathi uzoyithola ukuthi umama wakho wanukubezwa so uya kanjani esibongweni somnukubezi